Vizit Chèf Leta a nan Vale Latibonit.

0 226

Vire won Chèf Leta a nan Vale Latibonit.

Pòtoprens, vandredi 4 septanm 2020.- Prezidan Repiblik la, Ekselans Jovenel Moïse akonpanye ak Premyè Dam nan Martine Moïse fè yon vire won nan depatman Latibonit lan , vandredi 4 septanm 2020 an.

Kout pye sa nan Vale Latibonit lan, te okazyon pou Chèf Leta a vizite epi pale ak popilasyon Lyankou a sou travay ki ta dwe reyalize pou fasilite dlo rive nan tè yo , diskite sou pwoblèm ensekirite kap ravaje Vale a epi vizite espas enstalasyon gravèl tou nèf Prezidan Jovenel Moïse te kòmande pou fasilite pwodiksyon materyo pou betonaj kanal yo nan Vale a.

Nan Moro ( Pon Sonde) , Chèf Leta a lanse konstriksyon yon komisarya modèn ki ta dwe fini nan anviwon 3 mwa, epi remèt yon flòt 5 pikòp tou nèf ki pral ede polisye yo pi byen akonpanye popilasyon an nan batay kont gang ame kap Simen latwoublay nan Vale a.

Aprè yon diskou ki montre dezakò Chèf Leta a ak move zak kap poze nan Vale Latibonit lan, Prezidan Jovenel Moïse te pran direksyon Savyen, nan lide pou al konstate pèsonèlman sitiyasyon popilasyon an epi bay garanti Administrasyon Li an pap tolere okenn zak vagabondaj e lalwa ap aplike kont tout bandi ki deside mete dlo nan je popilasyon an.

Nan Lokalite Kòlmini (5e seksyon, Senmak) Ekselans Jovenel Moïse remèt bay responsab ODVA yo, 3 gwo materyèl ki pral sèvi pou kire rivyè yo nan tout Vale a. Pandan l pwomèt, nan bidjè 20-21 an pou mete lajan disponib nan lide pou pèmèt ODVA pi byen jwe wòl li.

Vizit Chèf Leta a nan Vale Latibonit lan rantre nan kad jefò lap fè pou founi je gade epi pote solisyon a divès pwoblèm kap sakaje popilasyon an, men sitou montre detèminasyon Li pou fè fas ak bandi kap dechèpiye moun nan ba Latibonit lan.

commentaires
Loading...
%d blogueurs aiment cette page :